Artikull

“Shkrihen” komisionet e Rrugores, vendimet për shkeljet e qarkullimit, në e-albania

605 Lexime

“Shkrihen” komisionet e policisë rrugore. Për gjobat mbi 5 mijë lekë dhe shkeljet me pezullim të lejes së drejtimit tashmë komunikimi me organin administrativ shtetëror, do të bëhet online, përmes e-albania.

Të gjithë drejtuesit e mjeteve që konstatohen në shkelje të rënda të rregullave të qarkullimit nuk do të paraqiten më fizikisht pranë zyrave të policisë rrugore. Pretendimet e tyre mund t’i depozitojnë online ne e-albania, aty ku do të njihen më pas edhe me vlerën e gjobës apo masën e pezullimit të patentës.

 “Lehtësimi i shërbimeve për qytetarët në të njëjtën kohë është edhe një lloj shtrëngese për ata që shkelin rregullat për arsye se tashmë mundësi e kontaktit bëhet zero.

Pra, nuk kanë mundësi të ‘negociojnë’ me asnjë lloj Komisioni. Kështu që kjo thirrje le të vlejë për të gjithë qytetarët që të sensibilizohen për të shtuar kujdesin në qarkullim”, tha ministri i Brendshëm Sandër Lleshaj.

Krahas abuzimeve që u la të nënkuptohen nga ministri i brendshëm, këto komisione ishin kthyer në shqetësim për qytetarët për shkak të radhëve të gjata që krijoheshin.

Ndërkohë, ministri Lleshaj paralajmëroi edhe ndryshimet në kodin rrugor të cilat do t’i dërgohen për miratim qeverisë dhe kuvendit pasi 2020 është shpallur më herët viti i sigurisë rrugore.